Soleiðis fært tú fundir, sum skapa úrslit og fremja samskifti

Málbólkur

Skeiðið er ætlað øllum, sum skipa og standa fyri fundu, bæði leiðarum og starvsfólkum.

Endamál

Endamálið við skeiðinum er at geva luttakarunum vitan og amboð til at halda úrslitagóðir fundir og at styrkja samskiftið.

Tíðarspill

Fundir eru týðandi arbeiðsháttur – vit brúka nógva tíð til fundir. Samstundis eru fundir ein tann størsti tíðartjóvurin. Kanning vísir, at 9 av 10 starvsfólkum eru fyri spilltíð á fundum, og tað kann elva til strongd, tá ið aðrar uppgávur liggja á láni. Vit kenna fundirnar, har tosað verður í ymsar ættir; fundurin verður drúgvur, og eingin veit við vissu, hvat niðurstøðan var. Á næsta fundi verður tosað upp í saman og summi fara enntá at ivast í, hví tey eru við á fundinum.

Orka og greitt samskifti

Tá fundir eru góðir, skapa teir framburð og vit fara glað og orkufylt frá fundinum. Fundir eru samstundis avgerandi fyri at styrkja felags fatanir, deila vitan, finna kreativar og haldgóðar loysnir, og eru avgerandi fyri at stuðla verður upp undir tiknar avgerðir.

Fyri nógv er tað trupult at siga sína meining. At samskifta assertivt merkir tað at siga sínar hugsanir beinleiðis, greitt og við virðing fyri sær sjálvum og øðrum. At geva og taka ímóti bæði jaligari og neiligari uppbyggiligari afturboðan er ein avbjóðing fyri tey flestu. Eisini kann tað vera trupult at siga til og standa við egnar hugsanir. Assertivt samskifti fyribyrgir misskiljingum og minkar um tvídrátt.

Á skeiðnum lærir tú at:

• Halda fokus á tað, sum skapar virði og framburð í viðgerð og kjaki
• Loysa trupuleikar munadygt, virðiliga og ábyrgdarfult
• Seta karmar um fundir, sum bæði skapa fortreytir fyri virkni og munadygd og at mál verða væl viðgjørd
• Seta mál og fáa onnur við til tess at tryggja, at málini verða rokkin
• Fyribyrgja og handfara tvídráttir
• Samskifta uppbyggiliga, so orkan í enn størri mun verður brúkt til at styrkja sambond og at skapa framburð

Innihald

Evnini á skeiðinum, eru m.a. hesi:

• Fundarstigini
• Ymisk fundarsløg
• Fundartrøll og tíðartjóvar
• Fundarleiðsla
• Bólkadynamikkur og feedback
• Kensluligur intelligensur og assertivt samskifti
• Teknikkir til at handfara tvídráttir
• At gera niðurstøður, útluta og fylgja upp

Undirvísingarháttur

Undirvísingarhátturin er sermerktur við samanrenning millum tað ástøðiliga og tað verkliga, ítøkiligum dømum og amboðum. Skift verður ímillum ymsar frálæruhættir, sum t.d. stuttar framløgur, fjølbroyttar venjingar og umrøða.

Undirvísari

Hjørdis G. Lailudóttir

Leiðslu- og HR ráðgevi

Hjørdis er útbúgvin cand. scient. pol. frá Københavns Universitet, PGDip. in Management frá Handilsskúlanum á Robert Gordon University. Hon hevur tikið Master í Løgfrøði á Fróðskaparsetur Føroya í juni 2025. Hjørdis hevur 15 ára royndir sum Leiðslu- og HR ráðgevi í Sp/f Movera. Hon hevur drúgvar royndir innan tað almenna og privata og sum undirvísari á Setrinum, á miðnámi og umvegis Movera, á stovnum, felagsskapum og fyritøkum.