Grundleggjandi leiðaraskeið í Suðuroy

Skeiðið vendir sær til fólk, sum hava styttri ella longri royndir innan leiðarastørv ella leiðaralíknandi størv í tí privata ella almenna økinum, ella vænta at fáa leiðsluábyrgd og sum vilja hava størri leiðslufakligt støði. Royndir leiðarar, sum hava fingið nýggjar arbeiðs- og leiðslufunktiónir kunnu eisini taka hetta skeiðið fyri at dagføra sínar førleikar sum leiðarar.

Skeiðið er dagskeið og varar 7 dagar, yvir 3 mánaðir.

Endamál við skeiðnum

Høvuðsendamálið við skeiðinum er at læra, hvat góð leiðsla er og verða meiri tilvitaði um leiðslu. Dentur verður m.a. lagdur á:

• Hvat er góð leiðsla, og hvussu verði eg ein góður leiðari?
• Hvat er “rættur” leiðarastílur og leiðsluháttur í ymiskum umstøðum?
• Hvussu klári eg at handfara samskifti og trupulleikar?
• Persónlig ráðlegging – fá skil á egnari tíð
• Tey grundleggjandi leiðsluamboðini
• Tú fær møguleikan at byggja upp samband við aðrar leiðarar – at skapa og virka í einum netverki.

Undirvísari

Steinbjørn Hardlei

Undirvísari

Steinbjørn er 55 ára gamal. Hann er útbúgvin cand. ocean í virkisbúskapi á universitetinum í Århus við denti á strategiska leiðslu, starvsfólkaleiðslu og broytingarleiðslu. Steinbjørn hevur altjóða leiðsluútbúgving innan organisatiónsmenning, virkissálarfrøði og coaching. Hann hevur hollar royndir sum undirvísari í leiðslu á hægri námi á Glasi, umframt 25 ára leiðsluroyndir innan føroyskar fyritøkur og stovnar. Harumframt hevur Steinbjørn drúgvar royndir at leiða og fremja menningar- og broytingarverkætlanir innan Strategi, HR og Organisatión. Steinbjørn eigur og rekur ráðgevingarfyritøkuna Hardlei Consult, ið veitir stovnum og fyritøkum fakliga og verkliga hjálp at menna teirra arbeiðspláss gjøgnum leiðslu- og starvsfólkamenning.

Skeiðsbygnaður

Skift verður ímillum stutt modul, heimauppgávur og cases, sum taka støði í tínum dagliga arbeiði, venjingar og fyrilestrar.

Skeiðið er skipað sum 5 modulir:

• Persónlig leiðsla
• Leiðsla og starvsfólk
• Leiðsla og fyriskipan
• Konfliktleiðsla
• Broytingarleiðsla
• Undirvísingin er løgd til rættis við bæði venjing og uppgávum. Skeiðið endar við eini einstaklinga høvuðsuppgávu.

Modul 1: Persónlig leiðsla

• Persónsmeting
• Sálarfrøðilig avtala
• Biografi hátturin
• Menning av fyriskipanarligum ástøði (organisatiónsteorium)
• Hvat vil tað siga, at verða leiðari?
• Hvørjar uppgávur hevur leiðarin?
• Hvat skapar góðar leiðarar?
• Leiðarastílur og leiðsluháttur
• Leiðsluuppgávur
• Tilrættislegging og raðfesting av egnari tíð

Modul 2: Leiðsla og starvsfólk

• Delegering
• Støðutengd leiðsla
• Leiðsluamboð
• Menniskjaáskoðan
• Tileggjan
• Amboð til menning av starvsfólki

Modul 3: Leiðsla og fyriskipan

• Leiðsla og relatiónir
• Leiðsla og samskifti
• Mentan í fyriskipanini
• Vitanarleiðsla
• Leiðsla og sjálvleiðsla

Modul 4: Konfliktleiðsla

• Samskiftisamboð
• Tann trupla samrøðan
• Ymisk sløg og fatanir av ósemjum
• Konflikttrappan
• Handfaring av ósemjum
• Konfliktstílur

Modul 5: Broytingarleiðsla

• Læring og menning
• Læring hjá tí einstaka
• Læring í fyriskipanini
• Hvussu ein best kann tillaga seg broytingar
• Tann góða framløgan
• Høvuðsuppgávan
• Eftirmeting

Á GLS gera lesandi uppgávu við útgangsstøði í egnari leiðslu og starvi. Uppgávan er uml. 2 síður í vavi. Uppgávan verður eftirmett á tann hátt, at lesandi leggja fram egna uppgávu og geva og fáa eftirmetingar frá hinum lesandi og frá undirvísaranum.

Tilboð um munnliga próvtøku

Um lesandi ynskja tað, ber til at fara til munnliga próvtøku í Leiðslu í verki á Akademiútbúgvingini á Glasi, Marknagil. Hesar upptøkutreytir eru fyri at fara til próvtøku á AÚ (skal skjalprógvast):

Yrkisútbúgving t.d. skrivstovuútbúgving (FHS + lærutíð)

ella

– Gymnasiala miðnámsútbúgving 

og

– 2 ára viðkomandi royndir

Í samband við munnligu próvtøkuna, verður ein vinnuuppgáva (erhvervscase) gjørd. Vinnuuppgávan er antin ein stutt lýsing av eini støðu (2 síður) ella til dømis ein stutt sjónbandaframløga, powerpointframløga ella líknandi, sum lýsir eina viðkomandi, veruleikakenda støðu frá egnum starvi.

Tá ein hevur staðið próvtøkuna fær ein prógv sum telur 10 ECTS-stig. Skeiðsluttakararnir, sum ynskja at tekna seg til próvtøku á Leiðslu í verki á Akademiútbúgvingini, skulu boða Skeiðsdeplinum frá í telduposti rro@glasir.fo. Kostnaðurin fyri at fara til próvtøku er kr. 1.000,-.