Dagføring í Fyrisitingarlóg og málsviðgerð

Endamál

Endamálið við skeiðnum er at geva luttakarunum, sum áður hava verið á skeiðnum Fyrisitingarlógin og málsviðgerð, eina dagføring. Eisini er skeiðið ætla teimum, sum vilja hava innlit í Fyrisitingarlógina og málsviðgerðina.

Málbólkur

Skeiðið er ætlað málsviðgerum í almennu fyrisitingini umframt øðrum, sum í dagliga starvi sínum koma í samband við fyrisitingarlógina

Innihald

Málsviðgerðarreglurnar í fyrisitingarlógini og reglurnar um góðan fyrisitingarsið, verða gjøgnumgingnar, viðgjørdar og útgreinaðar:

• lógarøki – hvat fevnir fyrisitingarlógin um?
• reglurnar um vegleiðing, umboðan og ógegni
• partshoyring, rætturin at geva ummæli, grundgeving og kæruvegleiðing
• tagnarskylda og avhandan av trúnaðarligum upplýsingum
• reglurnar um partsinnlit

Eisini verður greitt nærri frá skylduni at skriva upp (notatskylda).

Dømi frá m. a. dómstólunum, danska og føroyska umboðsmanninum verða tikin við í tann mun, tey kunnu lýsa nevndu málsviðgerðarreglur nærri.

Skeiðið fer eisini at viðgera tær fyrisitingarligu grundreglurnar, sum ikki eru lógarfestar. Hetta eru m. a. reglurnar um lóglig fyrilit, proportionalitet, heimild og líkskap. Hugt verður eisini eitt sindur at málsviðgerðarsiði annars, t. d. málsviðgerðartíð.

Nortið verður eisini við uppgávurnar hjá Løgtingsins umboðsmanni, eins og hvønn týdning umboðsmaðurin hevur fyri fyrisitingina sum heild.

Undirvísingarháttur 

Undirvísingin verður skipað sum fyrilestur, kjak og uppgávu- og bólkaarbeiði.

Undirvísari

Óli Høgnesen

Cand. jur og fyrrverandi advokatur

Óli Høgnesen hevur drúgvar undirvísingarroyndur bæði úr Danmark og Føroyum og hevur eisini virkað sum advokatur í nógv ár.