Almenn tænasta - Grundleggjandi tænastuskeið

– Intensivt 2-daga skeið

Á skeiðnum vera spurningar viðgjørdir so sum: Hví veita eina góða tænastu, tá talan ikki er um vøru ella tænastu frá einum privatum veitara, men eina almenna tænastuveiting? Hvat liggur í fyrisitingarlógini um tænastu?

Hvat er góð almenn tænasta?

Innan tað almenna hava lógir og reglar stóran týdning og eru í nógvum førum lættari at handfara enn væntanirnar hjá brúkaranum til tað almenna. Á skeiðnum verður arbeitt við, hvussu tú tekur støði í tí einstaka brúkaranum, teirra áhugamálum og motivatión. Øll skulu viðfarast eins – tí skulu tey viðfarast ymiskt við at samskiftið verður tillagað í mun til støðuna – tað er góð tænasta.

Sum borgari kann ein uppliva at fáa eina viðferð, ið sum so einki er galið við, men sum er eyðkent við frástøðu.

Kanningar vísa, at tað er torført at taka ímóti upplýsingum og vegleiðing, um ein ikki er tryggur og hevur álit á tann, vit tosa við.

Tað er avgerandi at borgarin fatar tað almenna sum álítandi, virki og ført.

Evni á skeiðnum

• At seta seg í brúkarans støðu
• Brúkaratypur
• Fyrisitingarlóg og tænasta
• Spyrjihættir og at skapa álit
• Samskifti & Kropsmál
• At vera tilstaðar
• Truplar avgreiðslur

Hvat fært tú burtur úr skeiðnum

Á skeiðnum fært tú vitan og tilvitan um meginreglur um góða fyrisiting.

Arbeitt verður við ymsum brúkaratypum og at tillaga tænastuna í mun til einstaka brúkaran.

Góð almenn tænasta er eisini at tora at vera seg sjálv/ur og at geva eitt sindur í samskiftinum við brúkaran. Tað er tá tað er stuttligt og skapar arbeiðsgleði, at geva eina tænastu.

Á skeiðnum verður eisini arbeitt við at skapa eitt uppbyggiligt samskifti og innlit í, hvat er avgerandi fyri, at brúkarin kennir seg hoyrdan og sæddan.
Tú fært amboð at handfara truplar samrøður, at venda støðunum til eitt uppbyggiligt samskifti og til góðar varandi relatiónir millum teg og borgaran.

Undirvísingarháttur

Undirvísingarhátturin er sermerktur við samanrenning millum ástøðiliga og tað verkliga, við ítøkiligum dømum og amboðum. Skift verður ímillum ymsar frálæruhættir, sum t.d. framløgur og fjølbroyttar venjingar, bæði persónligar og í smærri og størri toymum.

Undirvísari

Hjørdis G. Lailudóttir

Leiðslu- og HR ráðgevi

Hjørdis er útbúgvin cand. scient. pol. frá Københavns Universitet, PGDip. in Management frá Handilsskúlanum á Robert Gordon University. Hjørdis hevur 15 ára royndir sum Leiðslu- og HR ráðgevi í Sp/f Movera. Hon hevur drúgvar royndir innan tað almenna og privata og sum undirvísari á Setrinum, á miðnámi og umvegis Movera, á stovnum, felagsskapum og fyritøkum.