Machine Learning við Python

Inngangur

Hevur tú áhuga í programmering ella dátum og kundi hugsað tær at lært um Machine Learning, so er hetta skeiðið fyri teg. Machine Learning er eitt stórt øki. Vit arbeiða við Deep Learning, har tú lærir at gera loysnir í Keras/Tensorflow, sum er eitt framework, sum byggir á Python.

Málbólkur

Programmørar, dáta-greinarar, og tey, sum hava áhuga í at læra, hvat Machine Learning er, og hvussu man kan brúka tað í verki.

Endamál

Endamálið við skeiðinum er at geva tær grundleggjandi vitan og kunnleika um Machine Learning, soleiðis at tú kanst brúka hetta í verki í tínum egnu loysnum. 

Tú lærir, hvussu Machine Learning kann betra prosessir í eini fyritøku við at nýta automatisering og greining av dátum.

Fortreytir

Grundleggjandi programmering. Tú nýtist ikki at vera programmerings-snillingur, men kenna til hugtøk sum variablar, array, if og while, so kanst tú fáa stóra gleði av hesum skeiði. Tú mást have tína egnu teldu við, og hon má vera við Windows.

Innihald

Vit arbeiða við Klassificering (KL) og Regression (RE) ígjøgnum alt skeiðið. Høvuðsdentur verður lagdur á model og ikki dátur, tvs. at vit brúka einfaldar dátur í byrjanini og gera modell, sum virka í verki, og so líðandi vilja dátur blíva meira og meira centralar. Skeiðið hevur henda formin, og vit fylgja hesum punktum: 

1. KL og RE við Excel
2. KL og RE við Simuleringsamboð
3. KL og RE við Keras/Python
4. Dátuviðgerð

Undirvísingarháttur

Uppgávur eru týðandi á hesum skeiði. Tú arbeiðir alla tíðina við smaúm uppgávum.

Fyri at gera vegin til Python so góðan sum møguligt, arbeiðir tú við teimum somu uppgávunum tríggjar ferðir, men í meira og meira framkomnum amboðum.

Soleiðis blívir sjálvt uppgávan ikki miðdepilin, men tín læring.

Undirvísari

Jákup Wenningstedt Hansen

Cand. IT í Softwarekonstruktión

Jákup Wenningstedt Hansen er útbúgvin sum Cand. IT í Softwarekonstruktión frá Ålborg Universitet 2006. Hann hevur undirvíst á Datamatiker útbúgvingini í nærum 10 ár. Hann er nú undirvísari á Datatekniker Uddannelsen við sergrein í Programmering á Mercantec í Viborg, har han hevur arbeitt í 5 ár. Jákup hevur verið við til at skilgreina vallærugreinina Machine Learning og hevur sjálvur undirvíst í hesu lærugrein tey seinastu 3 árini. Meira kunning um Jákup og hansara undirvísing sæst her á hansara heimasíðu: www.jakup.dk