Grundskeið í Revit Architecture

– evningaramboðið innan byggiarbeiði

Inngangur 

Hevur tú ætlanir um, at førleikamenna teg innan faktekning á teldu, hevur tú møguleika til at luttaka á hesum skeiðnum. Skeiðið gevur tær førleikan til at tilrættaleggja, broyta og tekna 3D tekningar við forritinum Revit Architecture. Neyðugt er, at luttakarin hevur egna teldu við. 

Málbólkur 

Skeiðið er vælegnað til arkitektar, verkfrøðingar v.m. sum arbeiða innan teknistovur og ráðgevandi fyritøkur. Skeiðið er eisini vælegnað til tey sum arbeiða innan byggivinnuna, td. timburmenn, handverkarar, byggimeistarar vm. og annars ørðum áhugaðum.

Skeiðið er tillaga nýggir brúkarar av Revit Architecture. Luttakarin skal helst hava kunnleika til windows xp ella nýggjari forrit. Ein fyrimunur er, at luttakarin kennir til onnur tekniprogrammir, eitt nú AutoCAD, men tað er tó ikki ein treyt.

Endamál

Endamálið er at geva luttakaranum førleika til at tilrættaleggja, tekna og broyta 3D tekningar við forritinum Revit Architecture. Aftaná lokið skeið hevur luttakarin fingið eina grundleggjandi vitan um Revit Architecture og er førur fyri at tekna eitt brúkbart 3D model.

Innihald

• Lært verður um tær grundleggjandi funkurnar á 3D støði í Revit Architecture og luttakarin fær innlit í arbeiðsháttinum, sum er tengdur at hesum tekniprogramminum 
• Arbeitt verður við ymiskum byggilutum, bæði við at seta teir saman og at byggja teir upp eftir egnum ynski
• Byrja verður við tí heilt grundleggjandi, sum at upprætta modulnet, planir og hæddir. Síðan verður modellið útbýgd við veggum, vindeygum, hurðum o.s.fr.
• Luttakarin lærir at handfara 3D modelli og upprætta views, fasadutekning (húsasíður) og skurðar (tvørskurðar og longdarskurðar)
• Luttakarin lærir eisini at taka upplýsingar úr 3D modellinum, sum kunnu brúkast til eitt nú ein tilfarslista o.s.fr.
• Greitt verður eisini frá BIM (Building Information Modeling) og hvat ein brúkar hetta til

Undirvísingarháttur

Undirvísingin er bæði ástøðilig og verklig.