AB 18 - Nýggjar vanligar ásetingar fyri byggi- og verklagsarbeiði 

Innleiðsla

Øll avtaluskipanin í sambandi við bygging verður broytt. Nýggju reglurnar eru almannakunngjørdar 21. juni 2018 við gildiskomu 1. januar 2019 í Danmark. 

Hetta skeið leggur dent á broytingarnar í AB 92 - ið er vanliga støðið undir arbeiðstøkuavtalum. 

Bygnaðurin í AB 92 er óbroyttur í tí nýggju AB 18, men væntast kann, at innihaldsliga verða fleiri munandi broytingar.

Málbólkur

Partarnir í byggiverkætlanum - arbeiðstakarar, ráðgevar, byggiharrar - sum arbeiða við AB 92 nú og hava tørv á at fáa innlit í AB 18.

Endamál

At kunna seg við tær týdningarmestu nýggju ásetingarnar í AB 18 og hvar tær víkja frá AB 92, soleiðis at greiða fæst á, hvørjir møguleikar og avbjóðingar eru í sambandi við reglurnar, uttan mun til um tú er byggiharri, arbeiðstakari ella ráðgevi.

Innihald

Á skeiðinum fara vit at hugsavna okkum um tær týdningarmestu broytingarnar viðvíkjandi AB 92.

AB 92 fer framhaldandi at vera galdandi í øllum verandi avtalum. Tí verða nýggju reglurnar bornar saman við reglurnar í AB 92, so líkleikar og frávik gerast týðilig. Rættarsiðvenja eftir verandi reglum verður nýtt til bæði at vísa, hvussu praksis hevur verið við til at slóða fyri nýggju reglunum og til at veita íkast til eina betri fatan av teimum verandi og teimum nýggju reglunum.

Høvuðsevnini eru:

• Øktu krøvini til ráðlegging og tíðarstýring
• Skerping av skyldunum til at gera møgulig krøv galdandi (orsakað av seinking, eykaarbeiði, tíðarfreistarleinging o.ø.)
• Arbeiðstøkuprosjektering
• Prosjektgjøgnumgongd
• Indeksjavning og gjalding
• Nýggj avhendingarmannagongd
• Nýggj trætuloysnarskipan við ósemjustiga

Broytingar kunnu vera í innihaldinum, alt eftir hvussu AB 18 endaliga kemur at sýggja út.

Vangamynd - undirvísari

Vibeke Kragh, lektari og cand.jur. hevur undirvíst í arbeiðstøkurætti á útbúgvingini fyri byggifrøðingar á VIA University College í Horsens síðan 2008.

Hevur undirvíst á fleiri eftirútbúgvingargongdum, eitt nú á prosjektleiðaraútbúgving fyri byggifrøðingar, ið varð boðin út í samstarvi við danska byggifrøðingafelagið, og á leiðsluútbúgving hjá byggivinnuni, ið varð boðin út í samstarvi við Molio.

Hevur arbeitt sum advokatur (L) síðan 1991, tó við einum steðgi, tá ið hon undirvísti á Skeiðsdeplinum á Horsens Handilsskúla, har hon hevði ábyrgd av eftirútbúgvingini fyri advokatskrivarar.